Ramazaniyat (Nasri Nazm)

Nasri Nazm

نثری نظم

بڑا ثواب ہوتا ہے رمضانیات میں،
صوم و صلوٰۃ کی پابندی میں،
ذکر الٰہی میں،
تہجد میں، نفلوں میں،
دیگر غیر مذکورہ عبادات میں،
تلاوت و تجوید میں،
کسی روحانی نعت، حمد، نشید میں،
چھوٹی چھوٹی نیکیوں میں،
روزمرہ کی سنن میں۔۔۔

بڑا سکون ہوتا ہے رمضانیات میں۔
یہ وہ سکون ہوتا ہے
جس کا آغاز دنیا میں ہی شروع ہوجاتا ہے۔
سحری کی رونقیں،
اپنوں کی اپنوں کیلئے ڈھیروں دعائیں،
وہ حق کی وصیتیں،
جنت میں اُن کے ہمسائے ہونے کی التجا
جو نظروں کے سامنے نہ بھی ہوں
تو دل میں ہمیشہ کے مہمان رہتے ہیں۔۔۔

بڑا قرار ہوتا ہے رمضانیات میں،
اُن کی من پسند افطاری کی تیاریاں،
افطار کو بہانہ بنا کر
روابط استوار کرنا
اُن اپنوں سے جو انجانے ہوچکے ہیں،
اور اُن انجانوں سے جن کی اپنائیت
وہ ذائقہ افزا عنصر ہے
جس کا ہمیں ہی احساس نہیں
کہ ہم اُس کے کتنے ضرورت مند ہیں؛
تراویح کے سجدوں کے درمیاں
احباب و اعزا کی خیر و برکت کی عرضیاں،
رمضان نشریات و مسلسلات کے وقت
اُن متبسم و منور چہروں پہ ہنسی –
خاندان، دوست، مشفقون، رفقاء۔۔۔

بڑا ایک اپنا پن ہوتا ہے رمضانیات میں،
جو خاموشیوں سے بالا تر ہے،
وہ آپ سے باتیں،
اُن ستاروں کو خط رساں بنا کر –
جو بحرِ فواصل میں
اپنے اپنے جزائر پر مہجوروں کو
ایک نظر سے دیکھتے ہیں –
اُنہی ستاروں کے وہ اشارے،
کہ اِس وسیع کائنات کی وسعت کے آگے
یہ معمولی فاصلے معمولی ہیں،
اور کسی قریب کے ساحل پر ہی
ہمارے عزیز ترین اپنے
خیریت سے ہیں۔

چلئے اِسی بات پر
رمضانیات میں
آپ کے انتظار کے ساتھ
ہمارے ستاروں سے
آپ کی احوال پرسی بھی شامل۔

فجر اورنگزیب

Ramazaniyat

Bara sawaab hota hai Ramazaniyat mein,

Soum o salaat ki pabandi mein,

Zikr-e-Ilahi mein,

Tahajjud mein, naflon mein,

Deegar ghair-muzkoorah ibaadaat mein,

Tilawat o tajweed mein,

Kisi roohani naat, hamd, nasheed mein,

Chhoti chhoti nekion mein,

Rozmarrah ki sunnan mein…

Bara sukoon hota hai Ramazaniyat mein.

Yeh woh sukoon hota hai

jis ka aaghaz duniya mein hi shuru ho jata hai.

Sehri ki ronaqein,

apnon ki apnon ke liye dhairon duaein,

woh Haq ki wasiyatein,

Jannat mein unke hamsaaye hone ki iltijaa

jo nazron ke saamne na bhi hon

to dil mein hamesha ke mehmaan rehte hain…

Bara qarar hota hai Ramazaniyat mein,

un ki manpasand iftaari ki taiyarian,

iftar ko bahaana bana kar

rawabit ustuwaar karna

un apnon se jo anjaane ho chuke hain,

aur un anjaanon se jin ki apnayat

woh zaiqa-afza unsur hai

jis ka humen hi ehsaas nahi

ke hum us ke kitne zaroorat mand hain;

Taraweeh ke sajdon ke darmiyaan

ahbaab o a’zaa ki khair o barkat ki arzian,

Ramazan nashriyaat o musalsalaat ke waqt

un mutabasim o munawwar chehron pe hansi —

khandaan, dost, mushfiqoon, rufaqa…

Bara aik apna-pan hota hai Ramazaniyat mein,

jo khamoshiyon se baala-tar hai,

woh aap se baatein,

un sitaron ko khat-rasan bana kar —

jo bahr-e-fawasil mein

apne apne jazaa’ir par mehjooron ko

aik nazar se dekhte hain —

unhi sitaron ke woh ishaare,

ke is wasee’ kaainaat ki wus’at ke aage

yeh mamooli faaslay mamooli hain,

aur kisi qareeb ke saahil par hi

hamare azeez tareen apne

khairiyat se hain.

Chaliye isi baat par

Ramazaniyat mein

aap ke intezaar ke saath

hamare sitaron se

aap ki ahwaal-pursi bhi shaamil.

Fajr Aurangzeb

Insta Handle: @fajr_aurangzeb